ಕಿತ್ತೂರು ರಾಣಿ ಚನ್ನಮ್ಮ ವಿವಿ ಹಾಕಿ ಪಂದ್ಯಾವಳಿ: SRFGC ಕಾಲೇಜಿನ ಆರು ಮಂದಿ ಆಟಗಾರರು ‘ಯೂನಿವರ್ಸಿಟಿ ಬ್ಲೂ’ಗೆ ಆಯ್ಕೆ.
ಭಾರತ ಟೈಮ್ಸ್ ಸುದ್ದಿ:ಬೆಳಗಾವಿಯ ಕಿತ್ತೂರು ರಾಣಿ ಚನ್ನಮ್ಮ ವಿಶ್ವವಿದ್ಯಾಲಯದ (KRCU) ವತಿಯಿಂದ ನಗರದ ಸುಭಾಷ್ ಚಂದ್ರ ಬೋಸ್ ಮೈದಾನದಲ್ಲಿ (ಲೀಲೆ ಮೈದಾನ) ಆಯೋಜಿಸಲಾಗಿದ್ದ ಅಂತರ ಕಾಲೇಜು ಪುರುಷ ಹಾಗೂ ಮಹಿಳಾ ಹಾಕಿ ಪಂದ್ಯಾವಳಿಯಲ್ಲಿ ಬೆಳಗಾವಿಯ ಸಂಗೊಳ್ಳಿ ರಾಯಣ್ಣ ಪ್ರಥಮ ದರ್ಜೆ ಘಟಕ ಕಾಲೇಜು (SRFGC) ಅತ್ಯುತ್ತಮ ಪ್ರದರ್ಶನ ನೀಡಿ ಮೂರನೇ ಸ್ಥಾನವನ್ನು ತನ್ನದಾಗಿಸಿಕೊಂಡಿದೆ.
ವಿವಿಧ ಕಾಲೇಜುಗಳ ನೂರಾರು ಕ್ರೀಡಾಪಟುಗಳು ಉತ್ಸಾಹದಿಂದ ಪಾಲ್ಗೊಂಡಿದ್ದ ಈ ಪಂದ್ಯಾವಳಿಯಲ್ಲಿ, SRFGC ಕಾಲೇಜಿನ ಪುರುಷರ ಹಾಕಿ ತಂಡವು ತೀವ್ರ ಪೈಪೋಟಿ ನಡೆಸಿ ಈ ಯಶಸ್ಸು ಸಾಧಿಸಿದೆ. ಇದರೊಂದಿಗೆ ಕಾಲೇಜಿನ ಹೆಮ್ಮೆಯ ಕ್ರೀಡಾಪಟುಗಳಾದ ಸೃಷ್ಟಿ ಶೆಟ್ಟಿ, ಸಂಜೋತಾ ಚೌಗುಲೆ, ಪ್ರಜ್ವಾಲಾ ಬೆಳ್ವಿ, ರೋಶನ್ ಪಾಟೀಲ್, ಆಕಾಶ್ ಮತ್ತು ನಿಧಿ ಪಾಟೀಲ್ ಅವರು ‘ಯೂನಿವರ್ಸಿಟಿ ಬ್ಲೂ’ (ವಿಶ್ವವಿದ್ಯಾನಿಲಯ ತಂಡ)ಗೆ ಆಯ್ಕೆಯಾಗುವ ಮೂಲಕ ಕಾಲೇಜಿಗೆ ಕೀರ್ತಿ ತಂದಿದ್ದಾರೆ.
ಕಾಲೇಜಿನ ಕ್ರೀಡಾಪಟುಗಳ ಈ ಸಾಧನೆಗೆ ಪ್ರಾಂಶುಪಾಲ ಪ್ರೊ. ಎಸ್. ಸಿ. ಪಾಟೀಲ್, ಉಪ ಪ್ರಾಂಶುಪಾಲ ಪ್ರೊ. ಅರ್ಜುನ್ ಜಂಬಗಿ, ದೈಹಿಕ ಶಿಕ್ಷಣ ನಿರ್ದೇಶಕಿ ಡಾ. ಕರುಣಾ ಅಮರುಷ್ಕರ್, ಡಾ. ಗಿರಿಜಾಶಂಕರ್ ಮಾನೆ ಹಾಗೂ ಸಮಸ್ತ ಬೋಧಕ ಮತ್ತು ಬೋಧಕೇತರ ಸಿಬ್ಬಂದಿ ಹರ್ಷ ವ್ಯಕ್ತಪಡಿಸಿದ್ದು, ವಿಜೇತ ತಂಡದ ಆಟಗಾರರನ್ನು ಅಭಿನಂದಿಸಿ ಮುಂದಿನ ದಿನಗಳಲ್ಲಿ ಮತ್ತಷ್ಟು ಯಶಸ್ಸು ಸಾಧಿಸಲು ಶುಭ ಹಾರೈಸಿದ್ದಾರೆ.
